സൂക്ഷിക്കുക

കുമാരാ,

സൂക്ഷമില്ലാത്തവന്റെ മുതല്‌

നാണമില്ലാത്തവൻ കൊണ്ടുപോകും.

മണ്ണുംചാരി നിന്നവൻ

പെണ്ണും കൊണ്ടുപോകും

കാത്തുസൂക്ഷിച്ച കസ്‌തൂരിമാമ്പഴം

കാക്കകൊത്തിപ്പോകും.

സൂക്ഷിക്കുക-

തിരക്കിൽ പോക്കറ്റടിക്കാരും

മാലമോഷ്‌ടാക്കളും നേർജാരന്മാരും

ഒറ്റപ്പെടുമ്പോൾ ഭയവും…

കണ്ണുപോയാൽ കാലം;

കരൾ ആയുസ്സും

സൂക്ഷിക്കുക-

സ്വരുക്കൂട്ടിയ സ്വപ്‌നങ്ങളിൽ

വിഷപ്പാമ്പുകൾ ചുറ്റിപ്പടരുന്നത്‌

ഇണയുടെ കണ്ണീരിൽ

വഞ്ചനയുടെ മധുരം കിനിയുന്നത്‌

ചതിയുടെ സൂചിമുനയിൽ

ജീവൻ പിടയുന്നത്‌.

സൂക്ഷിക്കുക-

ഇടതുവശം പോകുക

വഴികളിൽ, വശങ്ങളില്ലാതെ

ഭ്രാന്തുപിടിക്കുമീ വേഗത

ഗോളജാലങ്ങളിൽ പാറിപ്പറന്ന്‌

ലയിക്കുമീ ശൂന്യതമസ്സ്‌

സൂക്ഷിക്കുക-

അമ്മിഞ്ഞ ഞൊട്ടി നുണഞ്ഞ

പാലിന്റെ ശേഷിപ്പുകൾ

തോറ്റും പിന്മാറാത്ത സന്മാർഗമൂല്യങ്ങൾ

കലയും സംസ്‌കാരവും കാച്ചിക്കുറുക്കിയോ-

രെന്റെ നാടെന്ന ഹൃദയമന്ദാരങ്ങൾ

ഇനിയും മരിക്കാത്തൊരാത്മവിശുദ്ധികൾ

സൂക്ഷിക്കുക-

ഒരിലച്ചോറ്‌

ഒരുതുളളി വെളളം

ഒരിലത്തണൽ

ഒരിറ്റുവെട്ടം

ഒരു പാട്ടും ഹൃദയവും….

സൂക്ഷിക്കാൻ അടക്കമുളള ഉറപ്പ്‌ വേണം

അച്ചടക്കമുളള കാവലാളും

നിയമവും പോലീസും ഭരണകൂടവും

അതിർത്തിയും പട്ടാളവും മുൾവേലിയും

സൂക്ഷ്‌മതയുളള ഗവേഷണങ്ങൾ വേണം

അതിസൂക്ഷ്‌മസാരം ആൾ-

ദൈവങ്ങൾ വേണം

കുത്തിമുളച്ച പ്രതീക്ഷകൾ നാമ്പിട്ട്‌

പുഷ്‌പങ്ങളായി വിടർന്നിടുമ്പോൾ

ഉത്തമജാഗ്രത വേണം

ഉണങ്ങാത്ത വൃക്ഷമായ്‌ മാറും വരെയും…

ഒക്കെയുമുണ്ടായിട്ടും കുമാരാ,

നിന്റെ മണ്ണും, നിനക്കായി പിറന്ന പെണ്ണും

നിന്റെ പ്രസ്ഥാനത്തിന്റെ ചൂരും,

കൊടിയുടെ ചുവപ്പും,

നിന്റെ നെഞ്ചിന്റെ താളവും

നിളയുടെ ഓളവും

ഈ നാടിന്റെ മാനവും

നാണമില്ലാത്തവർ

കൊണ്ടുപോയതെന്ത്യേ?

Generated from archived content: poem3_apr11.html Author: pk_unnikrishnan

അഭിപ്രായങ്ങൾ

അഭിപ്രായങ്ങൾ

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English