ഏകാകി

ഇവിടെ ഏകാകി ഞാനി,രുളിന്റെ നിറമുളള

നിമിഷങ്ങൾ പൂത്തുലയുമ്പോൾ

ഹൃദയതാളങ്ങൾ പിഴയ്‌ക്കയോ, ആദ്യത്തെ

അതിതീവ്രരോദനം കേൾപ്പൂ

കരിമുകിലാകാശച്ചെരുവിലനന്തമാം

വ്യഥപോലെ വീണുകിടക്കെ

രുധിരമൊഴുകുന്ന കരളിന്റെ തന്ത്രിയിൽ

പുതുരാഗമേതോ വിടർന്നു.

നരജീവിതത്തിന്റെ അതിദാരുണങ്ങളാം

അനുഭവസീമകൾതാണ്ടി

ഇനിയുമൊടുങ്ങാത്ത വഴിയിലശാന്തമാം

ചുടുകാറ്റുചുറ്റിയടിപ്പൂ-

അകലുന്ന ബന്ധങ്ങൾ അറിവിന്റെ ദുഃഖങ്ങൾ

അലതല്ലും ശാപശബ്‌ദങ്ങൾ

സ്‌മൃതി പഞ്ഞ്‌ജരത്തിൽ കുടുങ്ങിക്കിടക്കുന്നു

ചിതൽതിന്ന മോഹസ്വപ്‌നങ്ങൾ.

ഒരു സൗഹൃദത്തിന്റെ തരള കരങ്ങളെന്നരി-

കിലുണ്ടായിരുന്നെങ്കിൽ!

ഒരു സാന്ത്വനത്തിന്റെ കുളിർനാദമെങ്ങാ-

നുമിവിടെ ഉണ്ടായിരുന്നെങ്കിൽ!

Generated from archived content: poem5_june_05.html Author: c-surendran

അഭിപ്രായങ്ങൾ

അഭിപ്രായങ്ങൾ

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English