ഭയമാര്‍ന്നിടാതെ

bhayam

 

എന്നിലെ ചടുലചലനങ്ങളും

സുന്ദരപുഷ്പം മന്ദസ്മിതവും

ഭാണ്ഡത്തിലൊതുക്കി മുറുക്കികെട്ടി ഞാന്‍

ഭീതയായിട്ടിങ്ങു നില്‍ക്കേ

എങ്ങോ കൈവിട്ടു കളഞ്ഞ

ക്ഷണികമാം ജീവിതവാസന്തമേ

വിറയാര്‍ന്ന അധരങ്ങളാല്‍

നിന്നോടു യാത്ര ചൊല്ലട്ടെ ഞാന്‍

പറയാന്‍ ഭയന്ന വാക്കുകള്‍

ചിരിക്കാന്‍ മറന്ന നാളുകള്‍

മൃതിയെയെന്നപോല്‍

ജീവിതത്തെയും ഭയക്കുന്നതെന്തിനോ

ഏറെ വൈകിയൊരീവേളയില്‍

ആര്‍ക്കോ വേണ്ടി നഷ്ടപ്പെടുത്തിയ

ചാരുതയാര്‍ന്ന നിമിഷങ്ങളെ കുറിച്ചോര്‍ത്തു

പശ്ചാത്തപിക്കുന്നുവോ പാവം മനസ്സേ നീ

കഷ്ടനഷ്ടങ്ങള്‍ തന്‍ കണക്കെടുപ്പിലാഴ്ന്നു

ശിഷ്ടദിനങ്ങള്‍ തള്ളിനീക്കവേ

പയ്യെ ഞാനറിയാതെയെന്‍

പടിവാതിലിലൂടെ കടന്നെത്തുന്ന മൃത്യുവേ

നിന്നോടുച്ചൊല്ലീടട്ടെ ഞാന്‍

എന്‍ പാതയില്‍ നിന്നും വഴിമാറി നില്ക്ക

തരികയൊരിത്തിരി ദിനങ്ങള്‍

കൂടി എനിക്കായി നീ

ഉള്ളം തുറന്നൊന്നു ചിരിക്കുവാന്‍

ഉള്ളില്‍ കുരുങ്ങികിടക്കും വാക്കുകളൊക്കെയും

ഭയമാര്‍ന്നിടാതെ പറയുവാന്‍

ശിഷ്ടദിനങ്ങളിലെങ്കിലും ചന്തം പകര്‍ന്നീടുവാന്‍.

അഭിപ്രായങ്ങൾ

അഭിപ്രായങ്ങൾ

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English