ഭാഗ്യക്കുറി

lotta3” രണ്ടാംഭാവത്തില്‍ പരമോച്ചത്തില്‍ നില്‍ക്കുന്ന പൂര്‍ണചന്ദ്രന്‍ രണ്ടാം ഭാവാധിപന്‍ പതിനൊന്നില്‍ ഭാഗ്യാധിപനായ വ്യാഴത്തോടൊപ്പം ദശാപഹാരങ്ങളും വളരെ അനുകൂലം. താങ്കള്‍ക്ക് നിധി ലാഭം പ്രതീക്ഷിക്കാവുന്ന സമയമാണിപ്പോള്‍”

എയ്ഡഡ് സ്കൂള്‍ മാനേജരായ ധനപാലന്‍ ചെട്ടിയാരുടെ ഗ്രഹനില വിലയിരുത്തിയ കുമാരന്‍ ജോത്സ്യന്‍ അഭിപ്രായപ്പെട്ടു.

” സാക്ഷാല്‍ കുബേരനു പോലും ഇങ്ങനെയൊരു ഗ്രഹനില കാണില്ല. താങ്കള്‍ ഭാഗ്യക്കുറിയൊന്നും എടുക്കാറില്ലേ?”

ജോത്സ്യര്‍ ആശ്ചര്യത്തോടെ തിരക്കി.

” എടൂത്തിരുന്നു ഇക്കഴിഞ്ഞ ഓണം ബംബര്‍. അമ്പതു രൂപ പോയതു മിച്ചം” ധനപാലന്‍ ചെട്ടിയാര്‍ തന്റെ കഷണ്ടിത്തല തടവിക്കൊണ്ടു പറഞ്ഞു.

” എങ്കില്‍ ഒന്നു കൂടി പരീക്ഷിക്കണം. ചാരവശാലും സമയം വളരെ അനുകൂലമാണ്. പണം പടപടാന്ന് മടിയില്‍ വന്നു വീഴും ഒരു സംശയോംവേണ്ട ” കുമാരന്‍ ജോത്സ്യര്‍ ഉറപ്പിച്ചു പറഞ്ഞു.

” മടിയില്‍ വന്നു വീഴുന്നതു പാമ്പാണല്ലോ പണിക്കരേ. മിനിഞ്ഞാന്ന് ദാ ഇങ്ങനെ ഇരിക്കുമ്പോഴാണ് മുകളീന്ന് കെട്ടും വരയുമുള്ള ഒരു സാധനം പൊത്തോന്ന് മടിയിലേ‍ക്കു വീണത്. ഭാഗ്യത്തിന് ഒന്നും പറ്റീലാന്ന് മാത്രം”

ധനപാലന്‍ ചെട്ടിയാര്‍ നെടുവീര്‍പ്പിട്ടുകൊണ്ട് പറഞ്ഞു.

കുമാരന്‍ ജോത്സ്യര്‍ ഒന്നു നിവര്‍ന്നിരുന്നു.

” താങ്കള്‍ക്ക് ഒരാഴ്ചക്കുള്ളില്‍ ഭാഗ്യക്കുറിയോ മറ്റോ കിട്ടിയില്ലെങ്കില്‍ ഞാനീ പണി മതിയാക്കും ”

” എങ്കില്‍ ഒന്നു പരീക്ഷിച്ചിട്ടു തന്നെ കാര്യം. ഏറ്റാല്‍ എന്റെ വക പണിക്കര്‍ക്കൊരു പാരിതോഷികം ഉറപ്പ്”

ചെട്ടിയാര്‍ കുടവയര്‍ തടവി ഗൂഡസ്മിതത്തോടെ അറിയിച്ചു. കുമാരന്‍ ജോത്സ്യന്‍ അതിനു മറുപടിയെന്നോണം ഒരു ശ്ലോകം ചൊല്ലി എണീറ്റു . വരാനുള്ളത് വഴിയില്‍ തങ്ങില്ലന്നായിരുന്നു അതിന്റെ ചുരുക്കം.

പിറ്റേന്നു പ്രഭാതത്തില്‍ ചെട്ടിയാര്‍ പതിവു നടത്തിനായി പടിയിറങ്ങുമ്പോഴാണ് കാര്യസ്ഥന്‍ ഓടിക്കിതച്ചു വന്നത്.

” നമ്മുടെ വടിവേലുമാഷ് പോയി. ഹാര്‍ട്ട് അറ്റാക്ക് ”

ധനപാലന്‍ ചെട്ടിയാര്‍ അല്പ്പനേരത്തേക്ക് അങ്ങനെ തന്നെ നിന്നു പോയി. പിന്നെ തിരിച്ചു നടന്ന് പതുക്കെ ചാരുകസേരയില്‍ ചെന്നിരുന്നു.

” ശങ്കരാ ഈ വേക്കന്‍സീല്‍ ഒരാളെ വച്ചാല്‍ ഇപ്പഴ് എത്രവരെ പ്രതീക്ഷിക്കാം”? ഏറെ നേരത്തെ മൗനത്തിനൊടുവില്‍ ചെട്ടിയാര്‍ പതിഞ്ഞ ശബ്ദത്തില്‍ ചോദിച്ചു.

” ശമ്പളപരിഷ്ക്കരണമൊക്കെ വന്നതല്ലേ ഒരു ഇരുപത് ലക്ഷം എന്തായാലും ഉറപ്പാ” കാര്യസ്ഥന്‍ ശങ്കരന്‍ അടുത്തേക്ക് നീങ്ങി നിന്നു കൊണ്ട് അറിയിച്ചു.

” പിന്നെ ആ കുമാരന്‍ ജോത്സ്യരോട് സൗകര്യം പോലെ ഒന്നിവിടെ വരെ വരാന്‍ പറയ്യാ…. ചോദിച്ചാല്‍ ഭാഗ്യക്കുറി കിട്ടീന്നു പറഞ്ഞേക്ക്”

ചാരുകസേരയില്‍ അമര്‍ന്നിരുന്നുകൊണ്ട് ചെട്ടിയാര്‍ പറഞ്ഞു. പിന്നെ കാര്യസ്ഥനോടൊപ്പം ‍ പതുക്കെ വടിവേലു മാഷുടെ വീട്ടിലേക്കു നടന്നു

അഭിപ്രായങ്ങൾ

അഭിപ്രായങ്ങൾ

അഭിപ്രായം എഴുതുക

 Click this button or press Ctrl+G to toggle between Malayalam and English