ഓർമ്മകളിൽ പ്രിയ സുൽത്താൻ..

fabi-basheer

മലയാളത്തിന്റെ പ്രിയസുൽത്താനായ വൈക്കം മുഹമ്മദ് ബഷ്ഹിറിന്റെ ഓർമ്മകളുണർത്തി ഒരു ജൂലൈ അഞ്ച് കൂടി കടന്നു വരുന്നു. വർഷങ്ങൾ മുമ്പ് കോഴിക്കോടുണ്ടായിരുന്ന കുറെ നാളുകൾ ബഷീറിന്റെ വീട്ടിൽ പോകാനും അദ്ദേഹമില്ലായിരുന്നെങ്കിലും വീട്ടുകാരുമായി സൗഹൃദം പങ്കിടാനും കഴിഞ്ഞതിന്റെ ഓർമ്മകൾ ഇപ്പോഴും മനസ്സിൽ നിറഞ്ഞു നിൽക്കുന്നു. വയലാലിൽ വീടിന്റെ പഴമ തേടിയെത്തിയപ്പോൾ അവിടെ ഉയർന്നു വരുന്ന പുതിയ വീടാണ് സ്വാഗതം ചെയ്തത്. അന്ന് പുതിയ വീടിന്റെ അവസാന ഘട്ട മിനുക്കു പണികൾ നടക്കുകയായിരുന്നു. ഒരു മുറിയിൽ ബഷീർ ഉപയോഗിച്ചിരുന്ന ചാരു കസേര..’’സോജാ രാജകുമാരി ‘’ തുടങ്ങി സുൽത്താന്റെ പ്രിയഗാനങ്ങൾ ഒഴുകിയെത്തിയിരുന്ന ഗ്രാമഫോൺ..പുരസ്ക്കാരങ്ങളുടെയും ഷീൽഡുകളുടെയും നീണ്ടനിര.
അനീസിനും ബഷീറിന്റെ പേരക്കുട്ടികൾക്കും ഒപ്പം സുൽത്താന്റെ പ്രിയപ്പെട്ട മാങ്കോസ്റ്റിനു മുന്നിൽ നിന്ന് ഒരു ഫോട്ടോ എടുത്തിട്ട് ഞങ്ങൾ മകളുടെ വീടായ ‘’പ്രശാന്തി’’ലേക്ക് തിരിച്ചു. വീടു പണി നടക്കുന്നതിനാൽ തൊട്ടടുത്ത് തന്നെയുള്ള മകളുടെ വീടായ പ്രശാന്തിലാണ് അപ്പോൾ ഫാബി ബഷീർ താമസിച്ചിരുന്നത്. ബഷീറിന്റെ കഥകളിലൂടെ ചിരപരിചിതയായ ഫാബി ഇത്ത ഞങ്ങളെ സ്നേഹപൂർവ്വം സ്വീകരിച്ചു. ഒട്ടനവധി പുരസ്ക്കാരങ്ങൾ നിറഞ്ഞ ഷെൽഫ്, ഗസലിന്റെ സംഗീത ധാര..അതിനിടയി ൽ അവർ ബഷീറിന്റെ ഓർമ്മകൾ പങ്കു വെച്ചു.
‘’മൂപ്പരുമായി തലയോലപ്പറമ്പിലെ കുടുംബവീട്ടിൽ താമസമാക്കാനായിരുന്നു ആദ്യ പ്ളാൻ.പിന്നെ മൂപ്പർ തന്നെ പറഞ്ഞു,അത് ശരിയാകില്ല.വീട് അനുജൻമാർക്ക് കൊടുത്തേക്കാം. നമുക്ക് വേറെ നോക്കാം. പിന്നെയാണ് ബേപ്പൂർ വന്നത്.’’ പിന്നെ വൈക്കം സുൽത്താൻ ബേപ്പൂർ സുൽത്താനായ കഥയ്ക്ക് കാലം സാക്ഷി. ’’പലരും ചോദിച്ചു പഴയ വീട് എന്തിന് പൊളിക്കണം..അങ്ങനെ തീരുമാനിച്ചപ്പോൾ വിമർശനങ്ങളുടെ കൂരമ്പുകളായിരുന്നു.പക്ഷേ അനുദിനം ചിതൽ കാർന്നു തിന്നു കൊണ്ടിരുന്ന വീട് മാറ്റാതെ പറ്റില്ലെന്ന് എഞ്ചിനീയർ തീർത്തു പറഞ്ഞുപ്പോൾ പിന്നെ മറ്റ് മാർഗ്ഗമില്ലാതായി.’’
സംസാരിച്ചു കൊണ്ടിരുന്നപ്പോൾ ചായയുമായി ബഷീറിന്റെ പ്രിയ മകൾ ഷാഹിനയെത്തി.പാലൊഴിച്ച ചായ കുടിക്കുമ്പോൾ ഓർത്തു,മുമ്പ് ഇവിടെ പാൽച്ചായക്ക് അല്ലായിരുന്നല്ലോ സ്ഥാനം..ബഷീറിന്റെ പ്രിയപ്പെട്ട സുലൈമാനിയായിരുന്നല്ലോ അന്നത്തെ താരം..സുൽത്താന്റെ രചനകളിലൂടെ ഓരോ മലയാളിക്കും സുപരിചതമായ സുലൈമാനി. ബാപ്പയുടെ എഴുത്ത് രീതികൾ ഷാഹിനയാണ് വിവരിച്ചു തന്നത്.’’രാത്രിയായിരുന്നു എഴുത്ത്. രാവിലെ വരെ മുറിയിൽ വെളിച്ചം കാണും.നേരം വെളുക്കാറാകുമ്പോഴാണ് ഉറക്കം തുടങ്ങുന്നത്…ഉച്ചക്ക് പന്ത്രണ്ട് മണിവരെ നീളും ആ സുഖനിദ്ര.പിന്നെയാണ് ബാപ്പയുടെ ദിവസം തുടങ്ങുക.അപ്പോൾ ചായയോ ഭക്ഷണമോ ഒന്നും വേണ്ട.റവകൊണ്ട് ഉണ്ടാക്കിയ കുറുക്ക് പോലൊരു സാധനം.അതൊരു ഗ്ളാസ് കുടിക്കും.
രണ്ട് മണിക്ക് ശേഷമാണ് ഊണിന്റെകാര്യംആലോചിക്കുക.മാങ്ക്കോസ്റ്റിൻ,ചാരുകസേര,പിന്നെ സുലൈമാനി..ഇതായിരുന്നു ബാപ്പയുടെ പ്രിയപ്പെട്ട കൂട്ടുകാർ.
‘’ആദ്യമൊക്കെ ഞാനും അനീസും എഴുതുമായിരുന്നു.പിന്നെ അത് നിർത്തി,മറ്റൊന്നും കൊണ്ട്ല്ല എന്തെഴുതിയാലും ബാപ്പയുടെ സൃഷ്ടികളോടേ എല്ലാവരും താർതമ്യം ചെയ്യൂ.പിന്നെ ഒരു കുടുംബത്തിൽ ഒരു ജീനിയസ്സേ ഉണ്ടാകൂ എന്നാണല്ലോ പറയുന്നത്..’’ഷാഹിന പറഞ്ഞു നിർത്തി.
ബഷീറിന്റെ വേർപാടിന് ഇരുപത്തിനാല് വർഷമാകുന്നു,ഞങ്ങളുടെ സന്ദർശനത്തിന് ഇരുപത് വർഷവും..എങ്കിലും എത്ര വർഷങ്ങൾ കഴിഞ്ഞാലും മറക്കാൻ കഴിയുന്നതല്ലല്ലോ ആ ഓർമ്മകൾ..ജീവിച്ചിരുന്നപ്പോൾ സുൽത്താന്റെ സാമ്രാജ്യത്തിൽ പോകണമെന്ന് ആഗ്രഹിച്ചെങ്കിലും നടന്നില്ല.എങ്കിലും അദ്ദേഹത്തിന്റെ പ്രിയപ്പെട്ട ഫാബി ഇത്തയും മക്കളും നൽകിയ സ്നേഹം നിറഞ്ഞ സ്വീകരണം എന്നും മനസ്സിലുണ്ടാകും..ഇപ്പോൾ ഫാബി ഇത്തയും സുൽത്താന്റെ ലോകത്തേക്ക് മടങ്ങിയെങ്കിലും..
കഥകളായി,അനുഭവങ്ങളായി പകർന്നു നൽകിയ സ്നേഹമായി മലയാളമുള്ളിടത്തോളം പ്രിയ സുൽത്താനും നമ്മുടെ മനസ്സുക ളി ൽ നിറഞ്ഞു നിൽക്കും..

അഭിപ്രായങ്ങൾ

അഭിപ്രായങ്ങൾ

SHARE
Previous articleആർക്കും വേണ്ടാത്തവൾ
Next articleബാർകോഡ്
നൈന മണ്ണഞ്ചേരി
ആലപ്പുഴ ജില്ലയിലെ മണ്ണഞ്ചേരിയില്‍ 1967-ല്‍ ജനനം. മലയാളത്തില്‍ എം.എ.ബിഎഡ്.ബിരുദം.കഥകള്‍,കവിതകള്‍, ലേഖനങ്ങള്‍ തുടങ്ങിയവ പ്രസിദ്ധീകരിക്കുകയും ആകാശവാണി പ്രക്ഷേപണം ചെയ്യുകയും ചെയ്തിട്ടുണ്ട്. നര്‍മ്മസാഹിത്യരംഗത്ത് കൂടുതല്‍ സജീവം.പാലാ കെ.എം.മാത്യൂ പുരസ്കാരം,ചിക്കൂസ് പുരസ്ക്കാരം, പൂന്താനം പുരസ്കാരം, കലാകേന്ദ്രം പുരസ്കാരം, കല്‍ക്കട്ട പുരോഗമനകലാസാഹിത്യ സംഘം പുരസ്ക്കാരം,ബാംഗളൂര്‍ പ്രവാസിസാഹിത്യ പുരസ്ക്കാരം,ബാംഗളൂര്‍ മലയാളിസമാജം പുരസ്ക്കാരം, നെഹ്രുട്രോഫി ജലോത്സവ സുവനീർ കമ്മറ്റിയുടെ റിപ്പോര്‍ട്ടിംഗ് പുരസ്ക്കാരം തുടങ്ങിയ നേടിയിട്ടുണ്ട്. ‘’സൂക്ഷിക്കുക അവാര്‍ഡ് വരുന്നു’’, ‘’പങ്കന്‍സ് ഓണ്‍ കണ്‍ട്രി’’, ‘’ഇമ്മിണി ബല്യ നൂറ്’’ ''ഓമനപ്പാറ ഗ്രാമപഞ്ചായത്ത്',''വഴിയേ പോയ വിനോദയാത്ര'' തുടങ്ങിയ നര്‍മ്മ കഥാസമാഹാരങ്ങളും ''സ്നേഹതീരങ്ങളിൽ'',''മന്ത്രവാദിയുടെ കുതിര'' തുടങ്ങിയ ബാലസാഹിത്യ കൃതികളും പ്രസിദ്ധീകരിച്ചിട്ടുണ്ട്. പ്രസിദ്ധീകരിച്ചിട്ടുണ്ട്. ''സ്നേഹതീരങ്ങളിൽ'' എന്ന നോവൽ ''സ്നേഹതീരത്തെ അക്ഷരപ്പൂക്കൾ'' എന്ന പേരിൽ സിനിമയായി.ഇതിന്റെ തിരക്കഥ,സംഭാഷണം,ഗാനങ്ങൾ എഴുതി. ''നന്ദിത'' എന്ന സിനിമയിലും ഗാനങ്ങൾ എഴുതി. അഞ്ച് വര്‍ഷം സൗദിഅറേബ്യയില്‍ ജോലി ചെയ്തു. ഇപ്പോള്‍ ആലപ്പുഴ വ്യവസായ കോടതി യിലെ ജീവനക്കാരന്‍. എരമല്ലൂരില്‍ താമസിക്കുന്നു. വിലാസം: നൈനമണ്ണഞ്ചേരി, നൈനാസ്, എരമല്ലൂര്‍. പി.ഒ, ആലപ്പുഴ(ജില്ല) പിന്‍ -688537. Address: Phone: 9446054809

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English