Home Authors Posts by സതീശൻ ഒ.പി

സതീശൻ ഒ.പി

13 POSTS 0 COMMENTS

ആമ

    സൂക്ഷിച്ചു നോക്കൂ എനിക്കൊരു ആമയുടെ ഛായ ഇല്ലേ.? ചുറ്റും കണ്ടും കേട്ടും ഒരിലയനക്കത്തിൽ തന്നിലേക്കു ചുരുങ്ങിപ്പോകുന്ന ഒരു ആമയുടെ? പുറത്തു പുര കത്തുന്നുണ്ട്, ഇഷ്ടമുള്ളതു തിന്നതിന്റെ പേരിൽ- അവർക്കെതിരെ എഴുതിയതിന്റെ പേരിൽ ചോര പെയ്യുന്നുണ്ട്. മതത്തിന്റെ പല തൊഴുത്തിൽ നമ്മളെ മാറ്റി കെട്ടുവാൻ അവരെത്തിക്കഴിഞ്ഞു. എന്നിട്ടും കയ്യും തലയും പൂഴ്ത്തിവെക്കുന്ന ഒന്നാം തരം ഒരു ആമയാണു ഞാൻ. വായനക്കാരാ , ഇപ്പോഴാണു ശ്രദ്ധിക്കുന്നതു താങ്കൾക്കും എന്നെ പോലെ ഒരാമയുടെ ഛായ.  

മൗനം

വർണ്ണക്കടലാസുകൾ അലങ്കരിച്ച ഏതോ ഒരു ക്ലാസ്സിൽ നിൽക്കുകയാണ് ഞാൻ . കണ്ടിട്ടും കാണാത്ത പോലെ നീയും . ലോകത്തിലെ ഏറ്റവും ഒറ്റപ്പെട്ട ദ്വീപുകൾ ആയിരുന്നു നമ്മളപ്പോൾ . മൗനം മുറിക്കാനാവാം ഒരു മഴ പെയ്യാൻ വിതുമ്പുന്നു . പണ്ടെപ്പോഴോ മറ്റു രണ്ടുപേർ ഇതേ ക്ലാസ്സിൽ ഇതേ പോലെ നിന്നിരിക്കണം . മൗനം ഭാഷയാണെന്നറിഞ്ഞു പരസ്പരം ഒന്നും പറയാതെ അവരും മാഞ്ഞുപോയിട്ടുണ്ടാവണം. .

ഇരുട്ട്‌

ആരുടെയോ സങ്കടത്തിനു കൂട്ടിരിക്കുകയാണെന്നു പറഞ്ഞാൽ നിങ്ങൾ വിശ്വസിക്കുമോ.? മരിച്ചവർ അനാഥമാക്കിപ്പോയ സങ്കടങ്ങൾ ഇരുട്ടായി പുനർജനിക്കും. ഒരു മുറിവു മറ്റൊരു മുറിവിനു കൂട്ടിരിക്കും. മകൻ മരിച്ച ഒരച്ഛൻ കുഞ്ഞിന്റെ കരച്ചിൽ കേട്ടു ഞെട്ടുന്നെങ്കിൽ ഇരുളിന്റെ കൂട്ടുണ്ടാവും. മോണകാട്ടിയ ഒരു ചിരി, അദ്യം പറഞ്ഞ വാക്ക്, ആദ്യം കൊടുത്ത കുഞ്ഞുമ്മ, കുഞ്ഞുടുപ്പുകൾ, എല്ലാം ഓർമ്മയിലെത്തും. മുറിവു മുറിവിനു കാവൽ നിൽക്കും. തോറ്റ പ്രണയത്തിലെ വിട്ടുപോവാൻ പറ്റാത്തൊരോർമ്മ ഇരുളിൽ ആരോ ചികഞ്ഞെടുക്കുന്നുണ്ടു. നാടുവിട്ടുപോയ കൂട്ടുകാരനെ ആരൊ ഓർക്കുന്നുണ്ടു. ഇനിയും കണ്ടെത്തിയിട്ടില്ലാത്ത ഓർമ്മകളുടെ ദേശത്തേക്ക് ഇരുട്ട് പലരേയും കൊണ്ടുപോകുന്നുണ്ട്. സങ്കടങ്ങളുടെ ഘോഷയാത്ര പോകുന്നൊരു, തെരുവുണ്ടെന്നു പറഞ്ഞാൽ നിങ്ങൾ വിശ്വസിക്കുമോ.? ഞാൻ ആ ഇരുളിലെ കാഴ്ച്ചക്കാരനാണെന്നു , പറഞ്ഞാൽ നിങ്ങൾ വിശ്വസിക്കുമോ.? Generated from archived content: poem2_april19_16.html Author: satheesan_op

തീർച്ചയായും വായിക്കുക